الجمعة، 26 يونيو 2009

حلم ولا علم؟؟؟


صحيت فى يوم بالليل

بصيت لقيت مصرنا

ماشية وجره النيل

ماشيه وواخده هدومها

شايلاها فوق كتفها

ولفه فيها همومها

ودموعها فوق خدها

وهدومها متقطعة

عالصدر والرجلين

عالبطن والكتفين

وكل حتة فى جسمها

باينة لكل عنين

ناديت يا أم الدنيا

سايبانا راحة لفين؟

قالتلى واسعة الدنيا

وناس كتير تانيين

يتمنو مصر وخيرها

ويخافو عاللى باقيلها

يشيلونى جوا العين

فى ناس كتير تانيين

فى ناس كتير تانيين

الجمعة، 19 يونيو 2009

أنا ... والبلد ... وهواك

 
أحضنينى
وإنسى كل الكون فى حضنى واملكينى
قبلينى
بوسة عالخد الشمال
بوسه عالخد اليمين
ليكى منى ألف بوسة عالجبين
الف بوسة تحت رجلك
فوقها مليون الف بوسة
بس عندى سؤال يا بلدى
ليه يا بلدى عيشتنا فيكى
عنها بيقولم دى كوسة
؟؟؟؟؟؟؟؟؟؟؟؟؟؟؟؟؟؟؟
لأ يا بلدى متخافيش
انا وانتى بس اللى هنا
قاعدين فى اوضتى لوحدنا
وقفلت كل إزاز وشيش
من عنيا هوطى صوتى
بس برده ما ردتيش
ليه يا بلدى عيشتنا فيكى بقت مفيش؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ليه يا بلدى ابن عمى
تحت حجرة منك انتى
مد ايده عشان تمدى
وانتى برده ما مدتيش؟؟
ابن عمى
قبل ما يموت فى الدويقه
نادى ليكى
بص ليكى
عينه بتدور عليكى
يومها فاكر
دمعه نزلت من عنيكى
بس دمعه نازلة ساكته
صوت سكوتها بيناديكى
مدى إيدك لابن بطنك
شيلى من فوقه التراب
وارفعيه فوق السحاب
وافتحيله فى السما من كل باب
طاقه واحده يبص منها لجنتك
ولوحدتك
ولحرقتك
ولحرقة القلب اللى داب
فى محبتك
++++++++
ليه اخويا لو يسافر
ابقى ماسك قلبى خايف
قطر عمره
يسبق القطر اللى راكبه
يتقلب به
زى ألفين ماتو قبله
وانتى لسه ما حنتيش
الكلام مش للبكا
متعيطيش
نفسى أشوفك فوق جبين الارض شامة
نفسى أشوفك بين بلاد الكون علامة
زى ما اتعلمت عنك فى المدارس
دانتى ام الدنيا ديت
وانتى أمى
هاتى كفك
شيلى من فوق كتفى همى
سيبى همك
لو أموت به
هبقى ميت موتة الالفين شهيد
ماتو فوق قطر الصعيد
ماتو بالهم الشديد
ماتو وانتى زى مانتى
فنفس ركن الحزن قاعده
تبكى دمعات السكوت
قومى يلا وقولى لأه
واصرخيها بأعلى صوت
الف لأه للى بايع
الف لأه للى خاين
وافتحيله تحت سابع ارض من أسوأ خشب
أسوأ تابوت
قولى فوق كل المداين
اللى باع لازم يموت
واللى خان... لازم يموت

أخيرا..........دخلت عالم التدوين

اولا بسم الله الرحمن الرحيم
ثانيا والله يا جماعة مش عارف اقول ايه &حقيقى انا فرحان جدا انى دخلت عالم التدوين &بصراحه بقالى اكتر من سنة كاملة نفسى اعمل مدونة  &خاصة ان فى بعض حبايبى اللى بيشجعونى ربنا يكرمهم يا رب طلبو منى انى اعمل مدونة&المهم انى فضلت عالحال ده نفسى     ....     بس مش قادر
لمااااااااااااااااااااااااااااااااااااااا لحد ما ساعدنى اخويا وحبيب قلبى  (م \أنس العنانى)جزاه الله كل خير
هييييييييييييييييييييييييييه     المهم انى فى الاخر اصبح ليا مدونة أقدر ان شاء الله  اضع فيها كل اعمالى المتواضعة  اللى اتمنى بجد انها تنال اعجابكم
شكراااااااااااااااااااااااااا
سلام عليكم